రాఖీ"అంకితం"

పరిచిన పచ్చిక నేనై

అందిస్తా పాదాలకు మెత్తదనం

కప్పుకున్న దుప్పటినేనై

ఇస్తానీ మేనికి వెచ్చదనం

వీచే చిరుగాలిని నేనై

తెస్తాలే సుమ గంధం

కురిసే విరి తేనియ నేనై

రుచినిస్తా అధరాలకు తీయదనం

కూసే కలకోకిలనై

వినిపిస్తా నవ వేదం

విరిసే హరి విల్లును నేనై

కలిగిస్తా కంటికి ఆహ్లాదం

శబ్ద స్పర్శ రూప రస గంధాలు

పంచేంద్రియానుభూతి చందాలు

పంచభూత పరివేష్ఠితాలు

పంచ ప్రాణ ప్రతిష్ఠితాలు

సర్వం నీకే అర్పితాలు

సకలం నీకే అంకితాలు