Sunday, July 18, 2021

 "వరదగోదారి"


చేజారిన మణిపూసవి నువ్వు…

అనవరతం  నాలో జ్వలించే ధ్యాసవి నువ్వు

నవ్వుల జలతారు ముసుగేసుకుంటావ్

మనం ఒకరికొకరం తారస పడినప్పుడల్లా

కన్నులగుండా కరిగిన కలలని 

వెన్నెలగా మార్చి వెదజల్లే ప్రయత్నం చేస్తావ్…

ఎర్రని జీర ఏదో ఆ కన్నుల్లో జీరాడుతూనే ఉంటుంది

అసహాయ అయిన నీ హృదయానికి ప్రతినిధిగా

ఎక్కడో నీలో అంతర్లీనమైన విషాదరేఖ

నా మనసుకు మాత్రమే ద్యోతకమౌతుంది…


కప్పిపుచ్చే ప్రయత్నాలన్నీ పేలవంగా తయారౌతయ్,

కట్టుబాట్ల బంధనాలు

కప్పుకున్న షాలువా వెనుక

తారాడుతూనే ఉంటాయి,నిన్ను హెచ్చరిస్తూ…

సమాజం అడుగడునా పహారా కాస్తూనే ఉంది

మన మధ్య దూరాన్ని గుర్తుచేస్తూ…


కొలిమిలో కాలి కమిలిపోతున్న నా ఆరాటం

నిన్ను ఉక్కిరిబిక్కిరి చేస్తూనేఉంది..

మాటల మలాం పూస్తూ 

నువు ఊరట కలిగిస్తూ చేసే ప్రయత్నాలు

ఒకింత నవ్వు మరింత బాధ తెప్పిస్తుంటాయి


వెతలను కవితలుగా వ్యక్తపరచడం మినహా

మన దుస్థితికి ఈ దుఃఖాన్ని ఆర్పడం సాధ్యమా

ఎడబాటును జన్మలుదాటించేలా

ఎదిరిచూడడమే మన ప్రణయానికి పరాకాష్ట…


మన బాసలకు సాక్షమైన గోదావరి..

వరదలౌతోంది..మన కన్నీరు తనలోకి చేరినప్పుడల్లా…!!

Friday, July 9, 2021

 మది అనంత సంద్రమైంది…

                               

అక్షరాశ్రువులు ఆనందభాష్పాలుగా

పదాల పాదాలు క్షారాన్నీ క్షీరంగా..

కరడుగట్టిన లవణాంబుధి

క్షీరసాగరంగా 

మార్చిన విధి విలాసం..

అది అవధెరుగని మనోల్లాసం…


కాలకూటం సంజనితమౌతుందని

వెరిస్తే..

అమృతమెలా ఆవిర్భవిస్తుంది..?

హాలాహలధారియైన

కాలకాలుడుది ఆ విషమ విష విషయం..

ఆ సమయం అధిగమిస్తే

అంతా రసమయం..


అగాధ జలనిధిలో..

అపై నవనిధులూ సులభసాధ్యమే

మేధో మథనంలో

హృదయ కలమే మంథరం

అంతుపట్టని అంతరంగ మర్మం

అది ఆదికూర్మం..


దేవదానవ సంఘర్షణ సంఘానిది..

ఐతేనేం కవనమోహిని కనికరిస్తుంది..

సాహితీ హితుల మతులకు

కృతుల,సత్కృతుల 

సారస్వతామృతాన్ని ధారపోయుటకు…,


విమర్శనాగ్రేసర రాహుకేతుల గ్రహణాలకు..

సూర్య రాకేందులూ అతీతులవరు..


మంజుల మధుకర గీతాలను

సంజె పాడుతుంటే..

జన్మదాటిన బంధాలు

తామూ నేస్తాల చెలిమికి వంతపాడవూ..!!