"ఆనంద నాంది-వికారి ఉగాది"

కాలగర్భాన అరవై మంది కవలలు 

ఏకరూప కవలలు ఈ ఉగాదులు!

పేరేదైతేనేం తీరుమాత్రం మారదు

దారేదైతేనేం ఊరుమాత్రం చేర్చదు!!

అదే ఆరంభం అదే శుభం ప్రతి ఉగాదిది

అదే ఆశావహం,అదే విషాద భరితం ప్రతి ఏడాదిది

దుర్భిక్షం రాటుదేలినా అవే ఆరు రుచులు

దౌర్భాగ్యం రాజ్యమేలినా అవే ఆరు ఋతువులు

కొన ఊపిరి ఆశల సంజీవినీలు పంచాంగాలు

ఉరుకుల పరుగుల వికాసానికి 

ఉసూరుమనిపించే గ్రహచారాలు

శ్రుతి తప్పిన పికాలు ఎప్పుడూ బకరాలు

వంధ్యత్వం తో ఫలాలు కాదుకదా 

చివురులు సైతం నోచని మావి మోడు జీవితాలు

కవుల కవితల్లో మాత్రమే కాపురముండే 

మల్లెల వెన్నెల హాయిదనాలు

పీడా పోయిన విళంబి-చొరబడిన వికారి

కత్తిపోయి డోలువచ్చె-ఢాంఢాంఢాం కదా తంబి

ఉగాది జీవితానికి ఎప్పుడూ మంచిఉదాహరణం

చేదు వగరు కారం అలవాటేగ బ్రతుకున ప్రతి క్షణం

నిన్న ఎన్నడూ తిరిగిరాని సత్యం 

రేపు ఎప్పుడూ చేరుకోని స్వర్గం

నేడు పిడికిట చిక్కిన స్వప్నం

చేజార్చకు ఏమరుపాటుగా గుప్పిటి ఆణిముత్యం!

నీ అడుగడుగూ కావాలి ఒక ఆనంద నృత్యం!!