"అభిమతం"

రాజుకుంటోందో మూల నర్మగర్భంగా

నివురు గప్పిన నిప్పై  ఎద మర్మంగా

మా అభిమతమే మనగలగాలని

పరహితమన్నది హతమొనరిస్తూ

మానవతా హననమే తమధర్మంగా

సమైక్యతకు సమతకు చితిపేర్చే

పేచీలతో రాచిరంపాన పెడుతూ

పిట్టకొంచమై కూత చేత ఘనమై

లౌకికతకు భారతీయతకు ముప్పు తెస్తూ, తప్పని సరి తిప్పల బెడుతూ అంటకాగుతూ

చాపక్రింది నీరని నిర్లక్ష్యం చేస్తుంటే

ఉప్పెనై కప్పెట్టేదాకా కళ్ళప్పగించడమే…

పుట్టినూళ్ళే జైళ్ళై,వికృత రాచపుళ్ళై..,కాశ్మీరీ ఫైళ్ళై సెక్యూలరిజానికి సెక్యూరిటీ కరువై… విద్వేషం విస్తరిల్లి చొర్రంగ సోమలింగమై సొచ్చీ క్రూర పైశాచిక వీరంగమై…బహిరంగమై…

మనోభావాలు మైనాలకూ హైనాలకూ,బలహీనాలకే

ఎలా కూసినా కోసినా కూలదోసినా చెల్లేది వాటికే…!

మదగజాలు మృగరాజులు సమస్త సాధుజీవులు నోరెళ్ళబెట్టి చూసినా నోళ్ళూ గుళ్ళూ దేవుళ్ళూ పగుళ్ళ పాలై మూసినా,తల మాసినా వెతలెడబాసునా బాసూ., చేరినా శ్మశాన వాటికే…!!

దబాయించే రుబాబొకటి వాడి బాబుగాడి సొమ్మైనట్టు సంస్కృతి,సంప్రదాయాల చేసేస్తూ ఖరాబు…

లేడెవడు లేవడెవడూ ఎదురొడ్డే షరాబు…

కళ్ళముందు తేటతెల్లమై పడిఉన్నా కళ్ళకు గంతలు కట్టుకుంటే భవిష్యత్తు బాటంతా కంతలు గుంతలవడమే ఖాయం…

ఖాయిలా పడ్డ పౌరుల పౌరుషాలని కాస్త పునరుద్ధరిస్తే.,

 నా జెండా అంటూ అండగా అజెండా రూపొందుతుందని

ఊరుఊరంతా పీల్చుకుంటుంది ఊపిరి…!!

 "సార్థక నామధేయ శుభకృతు"

ఇది మనాది తొలగిన మన ఉగాది ఘన ఉగాది

నిన్నకు నేటికున్న ఉన్నతే నిజ ఉగాది ప్రజ ఉగాది

గతపు చేదు కారాలు

రేపటి తీపి వగరులు

ఈనాటి ఉప్పు పులుపులు

కలబోసినదే బ్రతుకు కడి

షడ్రుచులున్న ఉగాది పచ్చడి

పంచభూత శుభ ఫలితాలను పంచన ఉంచుకొనక

తెలంగాణ ప్రపంచానికి పంచుతున్న ఈశ్వరుడు

ఏ వంకలేని నెలవంకను దాల్చిన ఘనుడు చంద్రశేఖరుడు

వెతల గంగని తలాపునకు తెచ్చిన అపర భగీరథుడు

విస్ఫులింగాల విద్యుత్తుని నిరంతరాయం చేసిన త్రినేత్రుడు

గాలిమాటలు కాని నియామకాల ప్రాణవాయువందిచిన నీలకంఠుడు

మట్టిని అన్నంగా మార్చె రైతుకు బంధువైన సుందరేశ్వరుడు

విశాల భారత ఆకాశానికి ఆశాదీపమౌ  రామేశ్వరుడు

మన ముఖ్య అమాత్యుడై సారథ్యం వహిస్తూంటే

తెలంగాణ ప్రజల్లో బంగారు భవితకు నాడే పడింది పునాది

బడుగుల బ్రతుకుల్లో ఇక  ప్రతి ఏడాదీ శుభకృతు ఉగాది..

సబలలకు సమన్యాయం కూర్చే అర్ధనారీశ్వరుడు

ఆడపడుచులకు తోడబుట్టిన కాళేశ్వరుడు

సకల కులమతాలకు చేయూతనిచ్చే  రాజరాజేశ్వరుడు

దళితులకు ఆత్మబంధువైన దక్షిణా మూర్తి 

తమ్ములకు ఉపాధినొసగే అన్న కొమరెల్లి మల్లన్న

అండదండై ముందడుగు వేసే కీసర రామలింగన్న ఉండగ

తెలంగాణ ప్రజలకు  ప్రతిరోజూ ఔతుంది ఉగాది పండగ

బడుగుల బ్రతుకుల్లోకి నిత్యం వస్తుంది శుభకృతు  నిండుగ…!!

 "మహాభినిష్క్రమణ"

                              - డా.గొల్లపెల్లి రాంకిషన్(రాఖీ)

"నేను" విశ్వంలో లయమైపోతా

శూన్యంలో శూన్యమై మాయమౌతా

ఒక నిశ్శబ్ద నిశీధి చరమాంకంలో

ప్రళయమేం రాదు..

ఏ ప్రభుత్వమూ కూలదు

అతి సాధారణంగా

మరింత ప్రశాంతంగా తెల్లారుతుంది,

సోషల్ మీడియా పుణ్యమా అని

విషయం తెలియడం వల్ల

కొన్ని అయ్యోలు,అరెరేలు

మరిన్ని ప్చ్…హ్మ్ లమధ్య..

ఒక FB మిత్రుడు నా పిక్ వెతికి పట్టుకొని

లేదా నా గోడనాసరాగొని

ఒక RIP పడేస్తాడు…

ఓపిక ఉన్న ఒకరిద్దరు..

రాత్రే పోస్టుపెట్టాడే ఇంతలోనే ఇలానా

అని రెండు ముక్కల కామెంట్ పెడతారు..

ఆరోజో అంతక్రితమో చూసిన పోస్టునుండి

నలుగురు కాపీ పేస్టులు చేస్తారు..

నివాళి ,శ్రద్ధాంజలి..అంటూ తెలుగులోనూ

సందట్లో సడేమియాగా ఎవరో

'Many HAPPY returns of the day' అంటూ

పోస్ట్/పేస్ట్ చేసి చేతులు దులుపుకొని ముందుకి స్క్రోల్ చేస్తారు…

మనపోస్టుల  కెపుడైనా లైకో కామెంటో పెట్టాడా 

అనుకొంటూ ముందుకి స్క్రోల్ చేస్తారింకొందరు..

ఇవన్ని చూడ్డానికి మనమెలాగూ ఉండమన్నది ఎరిగిన సంగతే..

తప్పని సరైన ఆ నలుగురి సహకారంతో

దహనము దశదిన కర్మలూ జరిగిపోతాయి

ఐతేగియితే ఓ ఆనవాయితిగా

ఓ నలుగురితో

 ఓ సంతాప,సంస్మరణ సభ…

ఎంత అస్పష్టంగా ఈలోకానికి వచ్చామో

అంతకన్నా దయనీయంగా నిష్క్రమించడమే..

చరిత్రకెక్కినవాళ్ళు,చరిత్రలు సృష్టించినవాళ్ళు

జీర్ణంకాని వాస్తవమవుతూ

నాలా ఏ చరిత్రా లేనివాళ్ళూ, 

త్రిప్పేసిన పుటలౌతూ-

కాస్త అటూఇటూగా, ఇలా నిశ్శబ్దంగా

గాలిలో గాలిగా,నీటిలో నీరుగా 

నిప్పులో నిప్పుగా మట్టిలో మట్టిగా

అనంత శూన్యాకాశపు దిశగా

మహా ప్రస్థానం కొనసాగిస్తూ...

కనుమరుగౌతూ..స్మృతి మరుపౌతూ…!!

 "వరమే జరా రహిత మరణం"-డా.రాఖీ

తెలుసుకో నేస్తం నువు ముసలివాడివైనావని

మసలుకోనేస్తం నీకు నీవే తోడు నీడవని

ఎప్పుడైతే  నీ కంటె పెద్దలా తోచేవారు

నిన్ను అంకుల్ అని పిలుస్తారో

ఎప్పుడైతే మీ ఇరుగుపొరుగు పిల్లలంతా

 తాతయ్యా అని అరుస్తారో

ఎప్పుడైతే బస్సుల్లో రైళ్ళలో స్త్రీలు

 వాళ్ళ పక్కన కూర్చున్నా పెద్ద తేడాగా ఫీలవరో

నువ్ స్కూటిపై నడిరోడ్డుపై వెళ్ళుతున్నా 

ఇతర వాహనదార్లు నిను విసుక్కోక తప్పుకపోతారో

తెలుసుకో నేస్తం నువు ముసలివాడివైనావని

మసలుకోనేస్తం నీదైన నీదారి చూసుకునేలా

నీ కళ్ళముందటి నీ సంతానం నీకు సుద్దులు బోధిస్తుందో

నీకేం తెలియదు డాడీ అని నిర్ధారణ చేస్తుందో

ఓ మూలన పడి ఉంటే అన్నీ మేంచుసుకొంటామని విసుక్కుంటేనో..

నీ అర్ధాంగి ఎదిగిన పిల్లలంటూ వాళ్ళని వెనకేసుకొస్తుందో

అవసరం ఉన్నాలేకున్నా అభద్రతకు లోనై వాళ్ళ పక్షం వహిస్తుందో

మీ ఆహార వ్యవహారాలకు  రోజూ క్లాస్ పీకుతుందో

మీరు రైటైర్ అయ్యీకాగానే (పెన్షన్ వస్తున్నా కూడ)మీరు ఇంట్లోకూర్చొనే

ఓ గుదిబండగా భావిస్తూ అస్తమానం నిందిస్తుందో

తెలుసుకో నేస్తం నువు ముసలివాడివైనావని

మసలుకోనేస్తం ఏకాంతంగా కొనసాగేలా

రామాకృష్ణా అనుకుంటూ మూలన పడి ఉండటమో

చెప్పాపెట్టక ఏ దేశాలో పట్టి సన్యాసుల్లో కలవడమో

ఎప్పుడు ఈ జీవికి విముక్తి ప్రసాదిస్తావో అని దైవప్రార్థన చేయడమో

మీ కనిపిస్తేనో మీరలా చేస్తేనో

తెలుసుకో నేస్తం నువు ముసలివాడి వైనావని 

మసలుకోనేస్తం నీకొరకే నీమనుగడ సాగాలని

 "గడబిడ ఎడద"

కాలం రథచక్రాల క్రింది నలిగి,

నీకు ఎక్కడ దూరమౌతానోనని…

దూరం వల్ల నా మరపు మెల్ల మెల్లగా

నిన్ను ఆవరించుకొని

యాది మనాదౌతుంటే…

రోజువారి ఒత్తిళ్ళు,బాధ్యతలు 

నిన్ను కబళిస్తోంటే…

కబళింపబడిన నీ మదిలో 

నేను మరుగున పడక మరేమౌతాను…

మార్గమేదీ కనపడక ,

రవికి మబ్బుకి పడక ,

సూర్యునికి పట్టే గ్రహణమొకటిక, 

ఏదో ఒక కారణంగా 

నా వైపు చీకట్లు చిమ్ముతుంటేనూ…

మంజుల మనోహర నిక్వణ స్వన సమ నీ గాత్రం 

వినేభాగ్యం లభ్యమౌతుందా మళ్ళీ మళ్ళీనూ…

ఇదంతా నా పిచ్చిగాని,

నీకెంతవరకు నచ్చానో,

ఏ రోజైనా రోజులో ఏ క్షణమైనా 

నీ తలపుల్లో నేను మెదులుతాను 

అన్నది నా వెర్రి భ్రమ…

భ్రమలూ,ఊహలు,కల్పనలు,స్వప్నాలు

ఆనందం కలుజేస్తుంటే 

అందులోనే హాయి హాయిగా 

మనుగడ సాగించక 

ఎందుకీ అంతరంగ రగడ…

ఆలోచిస్తూ ఆస్వాదిస్తే 

అనుక్షణమూ కమ్మని మీగడ

తియతీయని చెఱకుగెడ…!!

 "నా కవన గోదావరి"

నిన్నే పిల్లా

నీవే నా వెన్నెల్లో ఆడపిల్ల..

నిన్ను చూసినప్పుడల్లా

నువు దక్కలేదని మెదిలి

కన్నులు చిప్పిల్లి

కనుకొసల మంచు ముత్యాలై

ఆగని అశ్రుధారలుగా

ఓ కంట ప్రాణహిత..ఓ కంట గోదావరి. .

నీ తడి పాదాలు 

నా కన్నీతో కడిగిమరీ

ముద్దెట్టకోవాలని నా స్వఛ్ఛమైన ఆశ

నిజమైన స్ఫటిక నీటి గోదావరి

పొగడపూలనందుకోవాలని 

అందక నువ్ పైకెగరుతూంటే

నిను నేను పైకెత్తినట్టు ఊహించుకుంటేనే

ఎదలో గలగలా గోదావరి

నీ చూపులు మిలమిలగోదావరి

నీ నవ్వులు నురగల గోదావరి

నీ వంపులు మెలికల గోదావరి

నీ నడుము పరుగుల గోదావరి

నీ నాభి సుడిగలగోదావరి

నీ పయ్యెద ఇసుక తిన్నెల గోదావరి

ఇలా నిన్ను పవిత్రంగా ఆరాధిస్తుంటే

నా వొళ్ళంతా దివ్య వరదగోదావరి

నీ జ్ఞాపకాలు రగిలినప్పుడల్లా

గుండెలో జ్వలిత గోదావరి

భవిష్యత్తు గుర్తొచ్చినప్పుడల్లా

బ్రతుకు ఎడారిలా ఎండిన గోదావరి

నువులేని జీవితం వల్లకాటి గోదావరి

నా బ్రతుకు కొడిగట్టే మరణగోదావరి

మరుజన్మకైనా నినుకోరే 

నా చిరుఆశ మౌనగోదావరి...!!

 దాంపత్యపు ఆధిపత్యం

ఒకే కలుగులో కాపురంచేసే పిల్లి ఎలుకలం

ఒకే చెట్టుపై వాసముంటున్న పామూ ముంగిసలం

నీ కష్టాన్నీ నా ఇష్టాన్నీ ఏ నాడైనా 

పరస్పరం అర్థం చేసుకున్నామా

మతమొకటైతేనేం అభిమతాలు వేరై

కులమొకటైతేనేం వ్యాకులాల నీడై

చిన్న చిన్నత్యాగాలైనా చేయక

కాస్తైనా పట్టూ విడుపూ లేక..

నీకుండే చిరుచిరు సరదాలు

పొందికగా ఇంటినుంచుకోవడం

ఒద్దికగా ఒంటినుంచుకోవడం

చొరవగా నీ పనుల్లో పాలుపంచుకోవడం

ఎదెరైన ప్రతివారినీ ప్రేమగా నవ్వుతూ పలకరించడం

ఏసాయానికైనా వెనకాడకుండా 

ఆదుకోవడం

నన్ను నీలా ఉండమంటే ఎలా,?

కొన్ని సుగుణాలు జన్మతః రావల్సిందే

ప్రత్యేకించి చేస్తే కృతకంగా ఉండవూ..

నీభావాలను నేనెప్పుడు అడ్డుకున్నానని

చిక్కల్లా నన్ను నీలా ఉండమంటేనే

నాకు ఇల్లు జైలుగా మలిస్తేనే..

ఒకరికొకరంలా కదా ఉండాల్సింది..

నీకోసం మాత్రమే నేను అంటేనో..

ఇచ్చిపుచ్చుకుంటే గౌరవం

ఇరువురమూ సర్దుకుంటేనే కాపురం..!!