చుట్టూ చీకటిని తిట్టకు-నిన్ను నీవు తిట్టుకోకు
ప్రయత్నించి చిరు దీపం వెలిగించుకో
కనీసం కన్నులన్నా మూసుకో
అప్పుడు బయటా లోపల చీకటి
లోపలి చీకటిని తరిమేయడం
నీకు రెండు విధాలా సుసాధ్యం
ఆత్మజ్యోతి వెలిగించగలిగినా
స్వప్నలోకాల్లో విహరించ గలిగినా
ఎంతకు రాని గమ్యం గురించి చింత వీడు
పయనమే రమ్యమనే భావం తో చూడు
వేచి ఉండాల్సి వచ్చినపుడు విసుగు చెందకు
నీవు నీతో గడప గలిగినందుకు సంతసించు
కొత్తపరిసరాలతో ఇమడలేక బాధ పడకు
ఇసుకలో తైలం తీసి అభినందనలందు
అడవిలో కుందేలుని చూసి ఆనందం పొందు
అనుభవించ గలిగితే అంతా ఆనందం
భయపడితే బ్రతుకే విషాదం!!