" కూడలి"

చల్లని సాయంకాలం చౌరస్తా ఒక ఆటవిడుపు

సరదాలకు కబుర్లకు అది పొద్దుపొడుపు

కలుసుకోవడానికి అదో అడ్డా

చిరకాలమిత్రులు ఆప్యాయంగా పలకరించుకుంటూ,

వ్యవహారాలు లావాదేవీలు ఉన్న వ్యక్తులు తెంచుకొంటూ

ఆ గోలలో గొడవలో మజానే వేరు ఎంత చెడ్డా....

ఆ పక్క చాయ్ వాలా  ,ఇటు వేపు పానీపూరీవాలా

పిల్లలు పెద్దలు భేదమే  లేక గప్ చుప్ ల గుటకలా

దాని వెనక పాన్ టేలా

మందు షాపు,మందుల షాపు రెండూ రష్ గానే ఉంటూ

ఎదురెదురే మరి.,

మిర్చీబజ్జీల బండి సరేసరి

పక్కపక్కనే కిరాణాకొట్టు ఫిష్ మార్కెట్టూ

 పిజ్జా బర్గర్ల బేకరీ .,

కాలేజి ఫ్రండ్సంతా చేరి

ఆ మూల పాదరక్షలు రిపేర్ చేస్తూ మోచీ

జాతీయ జీవన వికాస సూచీ

స్వీట్ షాపూ సెలూనూ స్టేషనరీ

ఎన్నరకాల వ్యాపారాలో ఆ దరి

వచ్చీ పోయే వాహనాల ట్రాఫిక్ జామ్ సదా

ఆగకుండా హారన్ల రొద

మల్లెపూల మూర తో సరసుడు

మందులు కొంటూ తనయుడు

మందుకొట్టి సేదతీరుతూ కష్టజీవి

రోజలు మారినా మారని ముఖచిత్రం

ప్రభుత్వాలు మారినా మారని 

బడుగుల బ్రతుకులు బహు చిత్రం..!